Dende comezos desta semana xa está a funcionar o bar ubicado na Área Recreativa de A Bola, ofrecendo un ano máis o servizo de restauración que cada ano acompaña o tempo de lecer para todas as persoas que se achegan a desfrutar deste emblemático lugar e dos preferidos polos visitantes ao noso municipio.
Esta será a primeira das tres sesións en liña da nosa Escola de Familias deste primeiro semestre do ano 2020. Desta volta, partillaremos con Andrea Rodríguez, psicóloga xeral sanitaria e psicóloga infanto-xuvenil que nos dará pautas para afrontar mellor os retos a nivel emocional e de xestión que supón a nova realidade que nos presenta a crise do COVID-19 dende agora e nos vindeiros meses.
Como xestionar emocións, como axudar ás nosas crianzas a facelo, cómo establecer normas e límites con elas en relación a aspectos tan importantes coma reencontros con amizades e familiares, as posibles rabechas e discusións xeradas pola situación, afrontamento de posibles mortes de persoas coñecidas ou cercanas e como xestionala cos/as máis peques da casa… En definitiva, consellos esenciais para adaptarnos mellor á nova realidade.
Dende hoxe están abertas as inscricións, que poderán realizarse ata o propio día 27 de maio ata as 14h. a través dos teléfonos: 988451293 e 604037952 (este último tamén por whatsapp) ou escribindo un correo electrónico a: educacionfamiliar@concelloabola.gal
Lembrade que neste formato, ao anotarvos, o día da primeira emisión da sesión en Internet (27 de maio) recibiredes un enlace para poder visualizala durante unha semana completa as veces que queirades.
Non hai límite de prazas! Esperámoste 🙂
É unha nova iniciativa dende o Programa de Educación e Apoio Familiar para continuar o proxecto que a comezos deste ano iniciou a súa terceira edición e que se viu truncado polo estado de alarma pola crise do COVID-19; non queriamos que quedasen sen ofrecer todos os contidos que tiñamos preparados para ofrecervos, e tamén seguir aprendendo xunt@s!
COMO VAN SER ESTAS SESIÓNS?
Moi sinxelo! As sesións serán impartidas por profesionais do sector, coma sempre! Serán gravadas e emitirase por primeira vez cada sesión nas datas indicadas e as persoas que vos anotedes teredes acceso dende esa data e durante unha semana completa para poder ver esa gravación nos momentos que teñades, e as veces que precisedes.
DENDE QUE DISPOSITIVOS PODO VER AS SESIÓNS?
Dende calquera! O teu móbil, unha tablet, un ordenador… Calquera dispositivo que esté conectado a Interntet.
HAI QUE INSCRIBIRSE?
Si, claro, coma sempre! Chamando aos números de teléfono 988451293 e 604037952, ou enviando un correo electrónico a: educacionfamiliar@concelloabola.gal. Tamén podedes poñervos en contacto con nós a través destes medios para ter máis información ao respecto.
Animádevos! Non hai límite de inscricións!!
Este domingo, día 17 de maio, como cada ano celébrase o Día das Letras Galegas. Este ano homenaxéase ao filólogo e escritor coruñés Don Ricardo Carvalho Calero, que xa dende moi novo destacou en diversos xéneros literarios.
Dende o Concello de A Bola, preparamos para celebrar este día un vídeo poema recitado polos nosos veciños e veciñas, concretamente o titulado «Ferrol 1916» no que Carvalho Calero rememora detalles da súa infancia na súa terra natal. Podedes velo premendo no seguinte enlace:
Moitas grazas ás familias participantes deste vídeo, e a toda a nosa veciñanza, porque son portadora e valedora deste ben inmaterial que é a nosa fala galega.
Feliz día das nosas letras!
Hoxe celébrase o Día Internacional das Familias, e queremos resaltar coma sempre o papel tan fundamental que ten esta figura na nosa sociedade, como motor de progreso e de benestar.
Este ano, tocounos vivir unha situación excepcional, unha crise sanitaria debido ao COVID-19 que obrigou a todas e todos a poñer en marcha todos os recursos habidos e por haber para manter unha situación social, laboral e famliar complexa, na que as crianzas foron as grandes heroínas co seu exemplo de adaptación.
Dende o concello de A Bola, a través do Programa de Educación e Apoio Familiar Municipal, queremos rendir homenaxe a todas elas novamente coñecendo a súa visión do vivido e do que están a vivir, e por iso, convocamos hoxe o que chamamos «FESTIVAL GRÁFICO: Quedamos na Casa», que virá a ser unha galería de vivencias, de impresións, de expresión… a través de debuxos e fotografías que nos acheguen daquelo que represente esta temporada nas vidas de cada un/a nos seus domicilios, nas súas vilas.
Máis información e envío de debuxos e fotos a través do 988451293, do 604037952 (tamén whatsapp) e no correo: educaciónfamiliar@concelloabola.gal
TELÉFONO GRATUITO DO SERGAS PARA CALQUERA INFORMACIÓN SOBRE O CORONAVIRUS (COVID-19)