Dende o concello de A Bola queremos felicitarvos cun pequeno vídeo que pretende reflectir o cariño e adicación das nosas veciñas e veciños ao poñer orixinais e vistosos adornos nas rúas, nas fachadas, nos negocios e nos seus fogares para «vestir A Bola de Nadal» entre tod@s este ano. Esperamos que vos guste!
FELICES FESTAS E PRÓSPERO ANINOVO!!
Podedes ver o vídeo premendo aquí: VÍDEO NADAL 2020
O noso servizo de atención á infancia municipal Espazo Medrando Xunt@s ofrecerá a nenos e nenas de entre 3 e 12 anos xornadas de actividades moi diversas nos días de vacacións lectivas, entre o 23 de decembro do 2020 e o 7 de xaneiro de 2021 (excepto os festivos do 25 de decembro e 1 e 6 de xaneiro), en horario de 9:45h. a 13:15h. Xogos, dinámicas, manualidades, baile, informática… Todo elo para pasalo ben tamén durante este Nadal!
As prazas son limitadas para seguir as esixencias de aforo e medidas ante a COVID-19, e poderán recibirse inscricións ata o venres día 18 de decembro. Para ter máis información e/ou solicitar o formulario de inscrición, pódese chamar ao 988451293, enviar correo electrónico a biblioteca@concelloabola.gal ou chamar e enviar mensaxe por Whatsapp e Telegram ao 604037952.
A QUE NON SABEDES QUEN DECIDIU VIR PASAR A PONTE AO CONCELLO DE A BOLA? O mesmiño Papá Noel, que escoitou marabillas do noso municipio, decidiu que este sería o lugar onde pasar estes días de ponte e tomarse un chocolatiño quente mentres espera a que o vaian visitar todos os veciños e veciñas, incluso para sacarse fotiños con el.
Tedes xa a carta para enviarlle? Pois aproveitade e deixádella alí para que xa a leve consigo ao Polo Norte, e prepare todo para cando volva na noite do 24 a todas as nosas casas. Así que xa sabedes!! Tedes unha cita pendente dende hoxe: VISITAR AO PAPÁ NOEL DA BOLA! Está en Veiga, xusto na entrada do concello onda o cruce para Allariz, a uns metros do edificio do concello. E logo da visita podedes ir tomarlle algo quentiño alí ao lado, na Forxa do Antón. Plan completo! 
IMPORTANTE!! Se te sacas unha foto con este Papá Noel, lembra etiquetarnos!! 
Facebook: Concello De A Bola
Instagram: @concello_abola
Hoxe é 25 de Novembro, e conmemórase o Día Internacional contra a Violencia de Xénero e vén lembrarnos que aínda hai moito por facer para eliminar a violencia machista da nosa sociedade, xa que segue a ser unha lacra que está a afectar a moitas mulleres e ás súas crianzas, e xa se levou a vida de 41 mulleres no presente 2020 (cifra actualizada a mes de novembro, o que supón o friolero cálculo aproximado dunha falecida por semana no que vai de ano)
A pandemia deste foi un factor moi negativo para a situación das mulleres vítimas de violencia de xénero, porque a pesares de que as denuncias por estatística se estancaron en número, as solicitudes de información a servizos de atención á muller e ao número 061 triplicáronse, o que indica que debemos seguir traballando para facilitar que as mulleres que o precisen poidan dar o paso para saír desa situación dun xeito eficaz e nunha contorna o máis segura e protectora posible.
Non debemos esquecer tampouco ás outras vítimas, as fillas e fillos destas mulleres que tamén viven esta situación de violencia e que precisan dos nosos esforzos para brindarlles a oportunidade que merecen de vivir unha situación de benestar e tranquilidade lonxe deste tipo de situacións.
Hoxe e os 365 días do ano, o concello de A Bola di NON á violencia de xénero, e poñemos a disposición das mulleres que o precisen todos os servizos e mecanismos que están da nosa man para axudalas a que ese cambio de situación sexa posible.
O concello de A Bola, no seu compromiso de continuar con iniciativas que fomenten e promovan a erradicación da violencia contra as mulleres, ten programadas novas actividades para conmemorar o día Día Internacional contra a Violencia de Xénero dentro do “Espazo de Mulleres” (subvencionado pola Secretaría Xeral de Igualdade da Xunta de Galicia en desenvolvemento do Pacto de Estado contra a violencia de xénero), que se levarán a cabo no Local Social de Veiga a partires das 16:30h. do día 23 de novembro, dirixidas tamén ás súas crianzas: por unha banda, teremos un contacontos sobre o libro “Pepuka y el monstruo que se llevó su sonrisa” de Estela Moreno, galardonado con diversos premios a nivel pedagóxico pola súa capacidade de recoller e transmitir á poboación infantil un tema tan complexo como é todo o proceso da violencia de xénero de xeito moi sutil e sinxelo de xeito que pode ser comprendido tanto polas crianzas coma por persoas adultas. E por outra banda, a continuación, realizarase un obradoiro temático no que traballaremos aspectos relacionados coa prevención da violencia de xénero a través da empatía e o respecto, da importancia das emocións e os bos tratos, na liña do traballado en diversos obradoiros realizados nos últimos meses para tal fin.
As prazas son limitadas, e coma todas as actividades que estamos levando a cabo seguiranse as medidas de seguridade e hixiene correspondentes ante a COVID-19.
Para máis información e inscricións: 988451293 ou 604037952 (tamén whatsapp), ou ben por correo electrónico a educacionfamiliar@concelloabola.gal
Como cada ano o noso concello colabora con Protección Civil e o Banco de Alimentos de Ourense na campaña «Por un Nadal feliz para todos» que consiste na recollida de alimentos non perecedoiros para repartir entre as persoas máis necesitadas. Este ano con maior motivo por mor da crise económica causada pola pandemia do Coronavirus atopámonos con casos de familias que precisan desta axuda básica, polo que animamos a que quen poida colabore con nós nesta tarefa solidaria achegando alimentos non perecedoiros (legumes, aceite, pasta, leite…) en bolsas pechadas aos puntos de recollida habilitados no centro de saúde e no edificio consistorial.
A recollida dos alimentos que reunamos realizarase en dúas tandas: unha ata o 18 de decembro e outra ata o 4 de xaneiro.
