Que andaremos argallando para este Nadal? Pois unha das cousiñas que temos entre mans é a posta en marcha da iniciativa de decoración comunitaria «A Bola vístese de Nadal», a través da que animamos ás familias, aos veciños e veciñas, a que poñamos engalanadas as nosas casiñas e negocios con motivos típicos destas datas, con obxectos novos, reutilizados, feitos a man, etc. na medida que cada unha poida e queira! Non hai un mínimo de adornos, nin un estilo único… Dádelle renda solta á imaxinación! É unha actividade en familia e en comunidade á vez, que nos levará logo a algo moi chulo… Anímaste a participar e descubrilo?
Se queres ter máis información, podes chamar ao 988451293, e para enviar as fotos da decoración rematada antes do día 16 de decembro podes facelo a través de Whatsapp ou Telegram ao 604037952 ou por correo electrónico a: educacionfamiliar@concelloabola.gal.
Hoxe é 25 de Novembro, e conmemórase o Día Internacional contra a Violencia de Xénero e vén lembrarnos que aínda hai moito por facer para eliminar a violencia machista da nosa sociedade, xa que segue a ser unha lacra que está a afectar a moitas mulleres e ás súas crianzas, e xa se levou a vida de 41 mulleres no presente 2020 (cifra actualizada a mes de novembro, o que supón o friolero cálculo aproximado dunha falecida por semana no que vai de ano)
A pandemia deste foi un factor moi negativo para a situación das mulleres vítimas de violencia de xénero, porque a pesares de que as denuncias por estatística se estancaron en número, as solicitudes de información a servizos de atención á muller e ao número 061 triplicáronse, o que indica que debemos seguir traballando para facilitar que as mulleres que o precisen poidan dar o paso para saír desa situación dun xeito eficaz e nunha contorna o máis segura e protectora posible.
Non debemos esquecer tampouco ás outras vítimas, as fillas e fillos destas mulleres que tamén viven esta situación de violencia e que precisan dos nosos esforzos para brindarlles a oportunidade que merecen de vivir unha situación de benestar e tranquilidade lonxe deste tipo de situacións.
Hoxe e os 365 días do ano, o concello de A Bola di NON á violencia de xénero, e poñemos a disposición das mulleres que o precisen todos os servizos e mecanismos que están da nosa man para axudalas a que ese cambio de situación sexa posible.
O concello de A Bola, no seu compromiso de continuar con iniciativas que fomenten e promovan a erradicación da violencia contra as mulleres, ten programadas novas actividades para conmemorar o día Día Internacional contra a Violencia de Xénero dentro do “Espazo de Mulleres” (subvencionado pola Secretaría Xeral de Igualdade da Xunta de Galicia en desenvolvemento do Pacto de Estado contra a violencia de xénero), que se levarán a cabo no Local Social de Veiga a partires das 16:30h. do día 23 de novembro, dirixidas tamén ás súas crianzas: por unha banda, teremos un contacontos sobre o libro “Pepuka y el monstruo que se llevó su sonrisa” de Estela Moreno, galardonado con diversos premios a nivel pedagóxico pola súa capacidade de recoller e transmitir á poboación infantil un tema tan complexo como é todo o proceso da violencia de xénero de xeito moi sutil e sinxelo de xeito que pode ser comprendido tanto polas crianzas coma por persoas adultas. E por outra banda, a continuación, realizarase un obradoiro temático no que traballaremos aspectos relacionados coa prevención da violencia de xénero a través da empatía e o respecto, da importancia das emocións e os bos tratos, na liña do traballado en diversos obradoiros realizados nos últimos meses para tal fin.
As prazas son limitadas, e coma todas as actividades que estamos levando a cabo seguiranse as medidas de seguridade e hixiene correspondentes ante a COVID-19.
Para máis información e inscricións: 988451293 ou 604037952 (tamén whatsapp), ou ben por correo electrónico a educacionfamiliar@concelloabola.gal
O pasado martes as crianzas do noso concello recibiron ao Apalpador e ao resto de personaxes que encheron o escenario de títeres: Martino, Andrés, o morcego torpón, un monstro monstruoso, un cocho-vehículo… As risas e aplausos encheron o local social de Veiga nunha tarde que se fixo do máis entretida.
E ti, tamén te achegaches ao noso concello para ver pasar aos ciclistas na etapa máis longa da competición? Foi todo un espectáculo velos pasar e tamén a todos os seus vehículos de equipo, persoal organizador, seguridade… Aquí vos deixamos algunha imaxe e vídeo que tomamos nese día.
O vindeiro martes día 10 de novembro ás 16:30h. no Local Social de Veiga (baixo concello) presentarase a actividade lúdica para toda a familia «As aventuras do Apalpador».
E sabedes quen é o Apalpador? Pois un pastor mangallón e bo, de mirada doce e longas barbas coloradas que, co seu abrigo cheo de remendos e a grandes zancadas, percorre Galicia enteira. Durante o ano fabrica carbón, vive dos froitos silvestres, caza xabarís, recolle mel e fai aparecer, coas pólas dos bosques e fragas, os xoguetes que as madeiras agochan. O 31 de decembro baixa aos pobos, visita aos nenos e nenas casa por casa e déixalles como obsequio castañas quentes e divertidos agasallos de madeira.
E como precisa moitas castañas para repartir entre as rapazas e rapaces de toda Galicia, está a comezar a apañalas polos nosos montes e bosques agora, na época do magosto, pero… qué aventuras lle sucederán polo camiño?? Se queres sabelo, só tes que anotarte chamando ao 988451293 ou ao 604037952, ou escribir un correo a educacionfamiliar@concelloabola.gal para anotarte e poder ver este espectáculo tan chulo e pasar unha divertida tarde de martes.
AS PRAZAS PARA ASISTIR SON LIMITADAS, xa que as condicións do local cumprirán coa normativa de aforo máximo establecido polo protocolo COVID-19 e tamén contarán con todas as medidas de hixiene e prevención ao respecto. A asistencia con mascarilla será obrigada para este evento.
