O vindeiro 7 de febreiro o local social de Veiga (baixo concello) acollerá unha reunión informativa sobre a concentración parcelaria, polígonos agrarios e outros xeitos de aproveitamento do rural a cargo de Alfredo Fernández Ríos, Subdirector de Mobilidade de Terra da Axencia Galega de Desenvolvemento Rural da Xunta de Galicia.
Aquelas persoas que non poidan achegarse presencialmente, poderán seguila en directo por Internet; para elo, deberán comunicarse co concello por teléfono no 988451293 ou correo electrónico: concello@concelloabola.gal e así poder facilitarlle o correpondente enlace e claves de acceso.
Este xoves día 5 ás 10:30h. uns Reis Magos moi especiais sairán dende a Casa Consistorial nos vehículos municipais para visitar todas as parroquias do concello repartindo caramelos e levarlles música e animación durante o día previo á noite máxica de Reis. A visita prolongarase durante toda a mañá e parte da tarde.
Mañá mércores día 4 de xaneiro ás 12h no local social de Veiga acolleremos o espectáculo «El Mensaje», unha obra de teatro de sombras que nace do traballo realizado no obradoiro creativo de teatro de sombras que A Casa Vella de Amiadoso levou a cabo en colaboración co noso concello nos meses de novembro e decembro do pasado 2022. Valérie Lenders é a artista responsable desta iniciativa e acompañará aos nenos e nenas neste espectáculo, xa que serán eles/as os/as responsables de executar esta obra que busca contar unha historia, con certo paralelismo á dos Reis Magos coa estrela de Oriente, tratando de concienciar sobre a cooperación, a solidariedade, e o respecto á natureza, entre outros importantes valores.
A entrada é libre para quen desexe asistir, e ao remate poñeremos un pequeno picoteo de roscón de Reis e bica para as crianzas e persoas asistentes.
